Rasti është zbuluar gjatë kontrollit të një autobusi që qarkullonte në linjën Stamboll–Gostivar. Pasi asnjë nga udhëtarët nuk deklaroi mallra për kontroll doganor, zyrtarët vendosën të kryejnë një kontroll më të detajuar të autobusit dhe të bagazheve të udhëtarëve.
Gjatë kontrollit, në brendësi të jastëkut për qafën që mbante me vete i dyshuari u gjetën 77 copë bizhuteri ari, me peshë të përgjithshme prej 612 gramësh.
Sipas provave të siguruara nga Departamenti i Hetimeve gjatë procedurës paraprake, i dyshuari e kishte blerë arin në një argjendari në Stamboll, me qëllim që ta fuste ilegalisht në Maqedoninë e Veriut dhe më pas ta shiste në argjendarinë e tij.
Bizhuteritë janë sekuestruar, ndërsa ndaj të dyshuarit është ngritur kallëzim penal për veprën penale të kontrabandës, e cila dënohet sipas Kodit Penal.
Nga Drejtoria Doganore theksojnë se mbeten të përkushtuar në luftën kundër kontrabandës dhe parandalimin e veprimtarive të paligjshme, me qëllim mbrojtjen e interesave financiare të shtetit dhe krijimin e kushteve për konkurrencë të drejtë në ekonomi.
