Në ambientet e Qeverisë së Republikës së Maqedonisë së Veriut, sot është nënshkruar një marrëveshje e rëndësishme për përmirësimin e kushteve mjedisore në Komunën e Gazi Babës. Marrëveshja parasheh furnizimin me pastrues ajri me efikasitet të lartë për shkollat fillore dhe çerdhet në këtë komunë.
Kryetari i Gazi Babës, Boban Stefkovski, theksoi se ky projekt është një hap konkret drejt mbrojtjes së shëndetit të fëmijëve dhe përmirësimit të cilësisë së jetesës në institucionet edukative.
“Ajri që e thithim çdo ditë ka ndikim të drejtpërdrejtë në shëndetin tonë, veçanërisht tek më të vegjlit. Investimi në pastrues ajri në shkolla dhe çerdhe është kujdes i drejtpërdrejtë për gjeneratat e reja”, tha Stefkovski.
Sipas tij, pajisjet që do të instalohen janë me kapacitet për të filtruar grimca PM, pluhur, polen, baktere dhe ndotës të tjerë, duke reduktuar rrezikun nga astma, alergjitë dhe infeksionet. Pastruesit do të vendosen në çdo klasë dhe hapësirë të brendshme edukative.
Kryetari shprehu mirënjohje ndaj Qeverisë, sekretarit të përgjithshëm Igor Janushev dhe kryeministrit Hristijan Mickoski për mbështetjen dhe përkushtimin në këtë drejtim.
“Kjo nuk është vetëm një masë teknike – kjo është vizion, përgjegjësi dhe kujdes për të ardhmen,” shtoi ai.
Komuna e Gazi Babës njoftoi se do të vazhdojë të investojë në cilësinë e arsimit, shëndetit dhe jetës për qytetarët e saj më të rinj.
