Venko Filipçe është para një vendimi nëse në Kërçovë LSDM do të garojë me kandidat, ndërsa për një mbështetje eventuale ndaj kandidatit të VMRO-DPMNE-së do të bëhet “pazari” në raundin e dytë.
Ky vendim ende nuk është zyrtarizuar, por sipas informacioneve të TV 24, betejën e LSDM-së në Kërçovë pritet ta udhëheqë kryetari i organizatës komunale, Oliver Nestorovski. TV 24 kontaktoi Nestorovskin, por ai refuzoi të komentojë duke thënë se vendimin zyrtar do ta marrë udhëheqësia e partisë.
TV 24 tashmë ka raportuar se Filipçe ka problem me Kërçovën, pasi si baza e partisë ashtu edhe udhëheqësia janë të ndara nëse duhet të kenë kandidat apo të mbështesin kandidatin e Hristijan Mickoskit.
“Qartë dhe zëshëm i kemi thënë udhëheqësisë se LSDM duhet të ketë kandidat në Kërçovë dhe se nuk do të lejojmë përsëritjen e vitit 2013. Është mirë që ka sinjale se udhëheqësia do ta dëgjojë bazën, pasi ne e dimë më së miri situatën këtu” – ka thënë për TV 24 një funksionar i degës komunale të LSDM-së në Kërçovë.
Për Kërçovën ende po kalkulon edhe Hristijan Mickoski. Edhe pse, sipas një funksionari të lartë partiak, thuajse është e sigurt se mjeku Aleksandar Jovanovski do të marrë sërish mbështetjen e VMRO-DPMNE-së për të garuar në Kërçovë, megjithatë lideri i partisë ende nuk e ka zyrtarizuar këtë.
Jovanovski ishte kandidat i VMRO-DPMNE-së në vitin 2021 dhe në raundin e dytë hyri me më shumë vota se Fatmir Dehari nga BDI, i cili në fund fitoi falë mbështetjes së diasporës.
Sipas paralajmërimeve, Jovanovski dhe Dehari do të përballen përsëri në këto zgjedhje. Edhe pse nga selia e BDI-së në Tetovë paralajmërojnë një “befasi të mundshme”, Ali Ahmeti i ka mbetur besnik Deharit. Para se ta zyrtarizonte Ahmeti, Dehari mori edhe një kallëzim penal nga MPB. Një funksionar i lartë i BDI-së i ka thënë TV 24 se Ahmeti pret që “artileria” e partisë, e mbështetur nga diaspora, të fokusohet te Kërçova.
“Kërçova është shumë e rëndësishme për BDI-në dhe BDI gjithmonë ka investuar maksimumin aty. Kandidati ynë është aktualisht kryetar komune në katër mandate dhe qytetarët e Kërçovës gjithmonë kanë zgjedhur siç duhet” – tha për TV 24 një funksionar i BDI-së.
Se nuk do të qëndrojë duarkryq as Hristijan Mickoski, e paralajmërojnë nga partia e tij. Një funksionar i lartë i VMRO-DPMNE-së ka thënë për TV 24 se për Kërçovën po përgatitet një strategji e veçantë për të rritur numrin e votave. Detaje mbi planin e Mickoskit nuk janë zbuluar.
Kur përmendet Kërçova, opinioni kujton marrëveshjen joformale mes Nikolla Gruevskit dhe Branko Cërvenkovskit për një kandidat të përbashkët në vitin 2013, që rezultoi me fitoren e kandidatit të partnerit të koalicionit të Gruevskit, Ali Ahmeti, dhe ai kandidat ishte po Fatmir Dehari.
