Ceferin uron Agim Ademin: Progresi i bërë ka vendosur themelet për të ardhmen

Presidenti i UEFA-s, Ceferin uron Agim Ademin: Progresi i bërë ka vendosur themelet për të ardhmen.
Presidenti i UEFA-s, Aleksandër Ceferin e ka uruar Agim Ademin, pasi ky i fundit u rizgjedh kryetar i Federatës së Futbollit të Kosovës (FFK) për një mandat të plotë katërvjeçar.
Menjëherë pas Kuvendit Zgjedhor të FFK-së, ku kryetari Agim Ademi u rikonfirmua në krye të Federatës së Futbollit të Kosovës për një mandat të ri katërvjeçar, ka arritur edhe telegram urimi i presidentit të UEFA-s, Aleksandër Ceferin.
Në urimin e tij për rizgjedhjen në krye të FFK-së kreu i qeverisë së futbollit evropian ka përgëzuar presidentin Ademi për ribesimin e marrë nga delegatët e Kuvendit të FFK-së dhe për punën e bërë gjatë mandatit të parë.
Më poshtë letra e plotë e Presidentit të UEFA-s, Aleksandër Ceferin:
I nderuar zoti President, i dashur Agim,
Jam i lumtur t’ju përgëzoj për rizgjedhjen në krye të Federatës së Futbollit të Kosovës.
Shumë punë të rëndësishme tashmë janë bërë për të ndërtuar dhe përmirësuar infrastrukturën e futbollit – stadiumet, fushat, qendrat kombëtare të stërvitjes janë disa shembuj kyç deri më sot.
Ky progres i jashtëzakonshëm ka vendosur themelet për të ardhmen dhe ka krijuar një mjedis ku futbolli mund të ngrihet dhe të rritet për të përmbushur potencialin e tij të plotë.
Të uroj gjithë të mirat në mandatin në vazhdim Agim dhe mezi pres të të takoj ty dhe të gjithë ekipin e Federatës së Futbollit të Kosovës, i cili vazhdon të inkurajojë, zgjerojë dhe ofrojë mundësi të reja dhe emocionuese për futbollin në Kosovë.