Shkup, 9 nëntor – Gjykimi për rastin me vrasjen e hendbollistit kroat, Denis Tot, i cili ishte rrahur deri në vdekje para një diskoteke në Parkun e Qytetit në Shkup vazhdon më 22 nëntor, pasi sot në Gjykatën Themelore Penale në Shkup dëshmoi një dëshmitar i rastit.
Në seancën e sotme dëshmoi Martin Gjorgjievski, i cili së bashku me të akuzuarit Anxhelo Gjorgievski, Klementina Levkovska dhe Andrej Kostovski kishte dalë natën kur ndodhi ngjarja konkrete.
Dëshmitari tregoi për rrjedhën e ngjarjeve në diskotekë deri në shkuarjen në taksi.
“Unë isha prapa bashkëvozitësit, më pas mendoj se Anxhelo u ul afër meje në mes, ndërsa Klementina hyri nga dera e majtë. Që të ulej edhe Viktori, Klementina u zhvendos tek Anxhelo në prehër. Denisi hyri në taksi dhe i thamë të dalë, sepse preism të hyjë një shok, por ai me këmbëngulje futej në taksi dhe filloi t’i thotë Klementinës fjalë ofenduese si dhe Anxhelos. Anxhelo i tha të qetësohej, ndërsa Klementina i tha të dalë sepse nuk ishte vendi për të. Atë pjesë të sekondës filloi një lloj tollovie brenda në taksi dhe kishte sulm ndaj Klementinës dhe Anxhelos nga ana e Denisit”, tregoi Martin Gjorgjievski.
Më pas, siç tha, Anxhelo kishte thirrur “pse më bie” dhe se e tërë ajo kishte ndodhur brenda një sekonde. Kur ka dalë nga taksi, tani i ndjeri Denis Tot, tashmë kishte rënë me shpinë dhe ai menjëherë kishte dalë për t’i ndarë.
“Ishte tronditje për mua, megjithatë, Denisin e kisha shok, çdo të dytën, tretën ditë të javës ne ishim së bashku”, tha ai.
Avokati Ile Tanev, në një deklaratë për mediat pas gjykimit, deklaroi se dëshmia e dëshmitarit shkon në drejtim tjetër.
“Jep një pasqyrë tjetër e cila në asnjë rast nuk mund t’i nënshtrohet atij kualifikimi i cili është dhënë, sepse, thjeshtë bëhet fjalë për një incident të momentit, bëhet fjalë për konflikt dhe bëhet fjalë për një zënkë të thjeshtë”, tha avokati.
Sipas tij, shpallje e pafajësisë nuk mund të pritet, por, shtoi, nëse mbetet një kualifikim i tillë juridik, do të ishte logjike sepse, siç tha “një vepër e tillë nuk ekziston”.
Prokuroria i ngarkon të akuzuarit Anxhelo Gjorgievski, Klementina Levkovska dhe Andrej Kostovski për vepër penale “vrasje” nga neni 123 paragrafi 1 lidhur me nenin 2 të Kodit penal. Në pajtim me aktakuzën, të akuzuarit ngarkohen se më 7 prill, para një klubi të natës në parkun e Qytetit në Shkup, bashkarisht e kanë privuar nga jeta të dëmtuarin Denis Tot.
Procesin e udhëheqë gjykatësja Elena Ilievska Josifoviq, ndërsa përfaqësues i prokurorisë është prokurorja Tanja Trajçevska.
Seanca e ardhshme gjyqësore në të cilën është paraparë që të merren në pyetje të akuzuarit është caktuar më 22 nëntor.
