Kandidati për deputet nga Partia Demokratike e Kosovës (PDK), Perparim Gruda, ka reaguar ndaj sulmeve të kryeministrit Albin Kurti ndaj Prokurorisë Speciale, duke e cilësuar këtë si një tregues të qartë të dështimit të plotë të Kurtit në realizimin e reformave të premtuara.
Gruda ka theksuar se sulmet ndaj institucioneve të drejtësisë, tregojnë gjithashtu frikën e Kurtit nga mundësia e zbulimit të korrupsionit endemik brenda qeverisë.
“Sulmet e Kurtit ndaj Prokurorisë së Shtetit janë një tregues i qartë i dështimit të tij të plotë në realizimin e reformave të premtuara dhe i frikës nga zbulimi i korrupsionit endemik qeveritar, siç konstatohet edhe në raportin e Departamentit Amerikan të Shtetit.
Kurti përsëriti mbrëmë premtimet e para katër viteve për reformimin e sistemit të drejtësisë, duke harruar se është në fund të mandatit. Tani ai duhet të fliste për realizimin e tyre, e jo t’i përsëriste ato.
Pse nuk e bëre padinë për gjenocid ndaj Serbisë, siç e ke premtuar në programin e qeverisë? Apo edhe këtu të pengon Prokuroria e Kosovës?
Të jesh kryeministër dhe të sulmosh në këtë mënyrë rendin ligjor dhe organet e drejtësisë të vendit tënd nuk është trimëri, por qyqarllëk”, ka shkruar Gruda në Facebook.
Burimi: botasot.info