Shkup, 27 Shtator – Ndikimi politik është rreziku më i madh për korrupsion dhe kemi konstatuar se kur bënim strategjinë kombëtare dhe analizonim rreziqet e korrupsionit, ndikimi politik ishte rreziku më i madh, tha për “Focus” kryetarja e DKSK-së, Biljana Ivanovska, e pyetur pse pavarësisht se kaq shumë kallëzime janë depozituar mbi të gjitha në prokurori, ato nuk marrin një përfundim të duhur.
“Rreziku i dytë më i madh është mosndëshkimi apo dënimi joadekuat, sepse ne kemi ligje të hartuara siç duhet, por që nuk zbatohen siç duhet”, sqaron ajo.
E pyetur nëse kjo është tipike për rastet e Sasho Mijallkovit dhe Orce Kamçevit, ajo shton se dobësia e sistemit është gjetja e rrugëve më të shkurtra për të anashkaluar atë që realisht duhet çrrënjosur dhe është plagë kancerogjene e kësaj shoqërie.
Sipas saj, rrugëdalja duhet kërkuar në forcimin e integritetit të nëpunësve civilë, institucioneve dhe përmirësimin e bashkëpunimit ndërinstitucional.
– Ligji për prejardhjen e pronës është i rëndësishëm sepse DHPGJS-ja ka një rol parandalues në atë proces dhe ajo pjesë është shumë e rëndësishme, çdo qytetar është i detyruar të thotë vetë se nga i ka ardhur prona, sepse kur punojnë në projekte, zyrtarët kanë pronë, por fshihet në emra të të afërmve, miqve etj dhe pas përfundimit të detyrës nuk janë të detyruar të paraqesin fletë anketë të re dhe me këtë ligj çdo qytetar do të ketë detyrim dhe nuk do i nënshtrohet presionit të politikanëve dhe t’u bëjë një shërbim për të deklaruar pasurinë në emër të tyre. Mekanizmi është vetëm një softuer i mirë dhe një sistem i mirë informativ, thotë Ivanovska.
Sipas saj, vetëm 30 për qind e rekomandimeve të Komisionit Shtetëror për Parandalimin e Korrupsionit janë zbatuar gjatë vitit të kaluar, ndërsa raporti për zbatimin e strategjisë kombëtare, e cila mbulon 12 sektorë, dy rrethe, prokurimin publik dhe punësimin tregoi se janë realizuar vetëm 20 për qind të aktiviteteve dhe kjo, sipas Ivanovskës, është shumë pak dhe e pakënaqshme.
Ivanovska mbajti një prezantim në temën luftimi i krimit ekonomik, ku përfshihet edhe korrupsioni, në konferencën finale të Programit Horizontal të Këshillit të BE-së për Ballkanin Perëndimor dhe Turqi.
