Qendra e Teheranit duket e zbrazur, dhe shumë dyqane, përfshirë edhe Pazarin e Madh të njohur, janë të mbyllura, diçka që më parë ndodhte vetëm gjatë protestave masive antiqeveritare ose gjatë pandemisë së koronavirusit. Në rrugët që lidhin kryeqytetin me perëndimin e Iranit ka bllokime të trafikut, ndërsa në pikat e karburantit krijohen radhë të gjata.
Sipas raporteve mediatike, shumë qytetarë janë nisur drejt rajonit të Detit Kaspik. Megjithë tensionet në rritje, autoritetet iraniane thonë se situata është nën kontroll dhe deri tani nuk kanë dhënë udhëzime specifike për popullatën, raporton “Times of Israel”.
Mediet lokale raportojnë se të paktën tre persona janë vrarë dhe katër janë plagosur në një sulm izraelit ndaj një postblloku pranë qytetit Kashan. Nuk është sqaruar nëse viktimat janë civilë apo ushtarakë.
Gjithashtu, televizioni shtetëror IRIB njoftoi se tre punonjës të tij u vranë në një sulm izraelit ndaj selisë së medias në Teheran të hënën dhe disa persona janë plagosur.
