Nikotina është një nga komponimet kryesore të duhanit dhe është shkaktari i krijimit të varësisë nga pirja e duhanit. Edhe pse shumica e duhanpirësve e dinë se cigaret janë të dëmshme për ta dhe shëndetin e tyre, është e vështirë të heqin dorë nga varësia ndaj nikotinës. Përdorimi i duhanit ka zgjatur për gati shtatë shekuj, ndërsa për nikotinën, përbërësi që gjendet natyrshëm në këtë bimë, ka ende shumë ide të gabuara. Në vijim, kontrolloni se sa dini për nikotinën.
- Nikotina është përbërësi më i dëmshëm i cigareve
Mit. Përbërësi më i dëmshëm i cigareve është në fakt vetë tymi i duhanit, i cili lirohet gjatë djegies. Tymi i cigares përmban më shumë se 6000 substanca, nga të cilat rreth 10 janë substanca të vërtetuara të dëmshme dhe me gjasë të dëmshme. Konfirmimi se nikotina nuk është fajtori kryesor i “sëmundjeve të pirjes së duhanit”, edhe pse krijon varësi, është vetë fakti se një nga terapitë më të pranuara për lënien e duhanit është ajo e bazuar në produkte zëvendësuese që përmbajnë nikotinë, siç janë fllasterët dhe çamçakëzët me nikotinë.
- Nikotina shkakton kancer të mushkërive
Mit. Problemet më serioze shëndetësore nga cigaret, si kanceri i mushkërive, emfizema e mushkërive dhe sëmundjet e zemrës, vijnë për shkak të disa prej substancave të tjera toksike të pranishme në tymin e cigares. Këto përfshijnë formaldehidin, cianidin, amoniakun dhe katranin.
- Nikotina shkakton varësi
E vërtetë. Nëse konsumoni produkte që përmbajnë nikotinë, duhet të dini se pas vetëm 10 sekondash, nikotina përthithet në qarkullimin e gjakut dhe fillon të aktivizojë substanca të ndryshme kimike, përfshirë adrenalinën. Kjo lejon që trupi të stimulohet dhe rrit qarkullimin e gjakut në tru.
- Nikotina gjendet vetëm në duhan dhe në produktet e duhanit
Mit. Nikotina u izolua nga bima e duhanit në shekullin e 16-të dhe që atëherë ka qenë një lëndë e vazhdueshme e hulumtimeve shkencore. Ndoshta kjo është arsyeja pse ne gabimisht besojmë se gjendet vetëm në këtë bimë. Është e vërtetë që është më e përqendruar te duhani, por në përqindje të ulët gjendet edhe në disa lloje perimesh, si patatet, domatet, patëllxhanët, si dhe tek manaferrat goxhi, të cilat bëjnë pjesë në kategorinë “superushqim”.
- Nikotina ndikon negativisht te gratë shtatzëna
E vërtetë. Për shkak të vetive të saj dhe faktit që është një substancë jo pa rrezik, si dhe një substancë që shkakton varësi, hulumtimet shkencore kanë treguar se nikotina mund të ndikojë negativisht te gratë shtatzëna, nënat që ushqejnë me gji, si dhe te njerëzit me probleme ekzistuese të zemrës, presion të lartë gjaku ose diabet. Prandaj, rekomandohet fuqimisht që kushdo që bën pjesë në këto kategori, të mos përdorë duhan apo produkte me nikotinë, në asnjë formë.
