Pas vrasjes së një gjyqtari në Shqipëri, i cili u qëllua në zemër nga një i pandehur dje në sallën e gjyqit, Shoqata e Gjyqtarëve të Maqedonisë ka lëshuar reagim, ku u bën thirrje individëve dhe strukturave me ndikim që të përmbahen nga deklaratat e tepruara sepse ato krijojnë një atmosferë mosbesimi dhe presioni, transmeton Portalb.mk.
“Ky akt përfaqëson një sulm serioz ndaj pavarësisë dhe dinjitetit të detyrës gjyqësore dhe është një kujtesë se gjyqtarët duhet të jenë në gjendje të kryejnë punën e tyre lirisht, profesionalisht dhe pa frikë për sigurinë e tyre personale. Sundimi i ligjit është i mundur vetëm kur gjyqësori është i mbrojtur nga çdo presion ose kërcënim. Shoqata u bën thirrje të gjitha institucioneve dhe palëve të interesuara përkatëse në shoqëri që të kontribuojnë në ruajtjen e dinjitetit dhe sigurisë së profesionit gjyqësor. Në të njëjtën kohë, ne bëjmë thirrje për kujdes të veçantë në komentet publike mbi procedurat gjyqësore dhe mbajtësit e pushtetit gjyqësor, veçanërisht nga individë dhe struktura me ndikim, sepse deklaratat e tepruara mund të krijojnë një atmosferë mosbesimi dhe presioni, të cilat mund të inkurajojnë në mënyrë indirekte ngjarje të padëshiruara dhe tragjike. Shoqata e Gjyqtarëve të Republikës së Maqedonisë së Veriut mbetet e përkushtuar për të promovuar dhe mbrojtur pavarësinë, paanshmërinë dhe sigurinë e gjyqtarëve, si bazë për një shoqëri të drejtë dhe demokratike”, thuhet në reagimin e Shoqatës.
Struktura qeverisëse, veçanërisht gjatë fushatës, ka intensifikuar kritikat ndaj gjyqësorit, duke akuzuar disa gjyqtarë dhe prokurorë se janë të korruptuar dhe se kanë bashkëpunuar me qeverinë e mëparshme. Kryeministri Hristijan Mickoski i quan gjyqtarët dhe prokurorët “bastionin e fundit të krimit dhe korrupsionit” dhe thotë se ata nuk i meritojnë pagat që marrin, edhe pse Komisioni Evropian po kërkon rritjen e tyre.
Gjyqtari i apelit Astrit Kalaja u dërgua dje në një spital në Tiranë, ku ndërroi jetë nga plagët e marra. Autori i krimit, Elvis Shkambi, qëlloi me tre plumba drejt gjyqtarit Kalaja, menjëherë pasi ai filloi të lexonte vendimin në çështjen e tij.
Gjyqtari Kalaja po trajtonte një çështje në lidhje me pronësinë e një ish-ndërtese shkolle në qytetin verior të Shkodrës, ku banonin 31 familje. Familjet paditën Shkambin për përdorimin e dokumenteve të falsifikuara për t’u bërë pronar i ndërtesës dhe zonës përreth dhe duke kërkuar që ata të lironin ndërtesën.
Po hetohet se si vrasësi, kaloi nëpër disa kontrolle fizike dhe detektorë metalesh.
